英超勁旅車路士季前展開遠東之旅，今日下午造訪澳洲與西悉尼流浪者「拍跳」，開波時間夠靚兼有免費直播，更加係車仔新帥沙比阿朗素首度領軍，眾將必定趁機爭取表現，佢哋熱身賽初段例搶韁，隨時上半場已經大手交易，球迷們咪錯過。（HOY TV 76台周二下午5時45分直播）文:法達斯維
經歷失意一季後，由新帥沙比阿朗素執教嘅車路士，今夏豪擲超過3億鎊大事增兵，球隊目標遠大。「車仔」今夏會造訪澳洲、香港、印尼、馬來西亞進行巡迴賽集訓兼掘金，雖然摩根羅渣士、列斯占士等世盃國腳未歸隊，但依然星味十足，隨隊球員包括有高爾彭馬、祖奧柏度、利安戴納等攻擊球員，意大利國腳級新兵馬高柏利斯查亦在今次集訓球員名單，尤其係對落選世盃大軍嘅高爾彭馬同祖奧柏度嚟講，今次遠東之旅可謂重新出發，其餘邊緣球員，亦希望喺沙比Sir面前博表現留個好印象，喺新一季獲得更多上陣機會，絕對唔會hea踢。
西悉尼流浪者冇包袱放開踢
今場亦係沙比Sir上任頭炮，呢位執教利華古遜大獲好評、但上季轉教皇馬半季就被炒嘅少帥，希望喺車仔重建聲譽。沙比Sir一向崇尚進攻，今次藉住熱身賽試陣之餘，亦希望以娛樂性踢法取悅觀眾，務求盡快取得入球，睇番佢哋之前7仗熱身賽5次半場開2球或以上，可見入局快初段多波入。
另邊廂，澳職現正休季，西悉尼流浪者球員狀態剛操起，近日出戰澳足盃對低組別的老虎FC，結果贏2比0，該隊隊長、前國腳班頓波里路有1球進帳，預計球隊表現將繼續提升，加上難得同英超勁旅同場切磋，冇乜包袱下唔會太保守，初段已合演入球騷都唔奇。